COLUMN van Piety: Lentekriebels

~~‘Wel het die zo te pakken had?’ Dat vroeg collegoa A mie vurreg veurjoar bie de printer op mien waark. En direkt greep ze mien aarm vast en streek onderzuikend over mien vingers en polsen. Ik schrok van mien aigen onderaarms. Aalmoal open bultjes en krassen. n Beetje dik en rood. En t jeukte ook nog.
 
t Leek wel of k ruzie met de kat had haar. Mor dat is nait woar. k Heb nait ains n kat. Toch zee ik t, met n kwinkslag.
n Blik van ongeloof. ‘Moak dat de kat wies. Dit is nait normoal. Bist oaftuugd of zo?’

k Ston even met de mond vol tanden. Mor tied om te antwoorden was er nait want collegoa B kwam der aan met n deurzichtege blik op t horloge. Collegoa A griste heur ofdrukken van t apperoat en vloog der met vot.

Kreeg mien man dus toch geliek met zien gepruttel: ‘Straks denken ze nog dast oaftuugd bist.’
‘Dastoe mie dus oaftuugd hest,’ grapte ik destieds en wreef mien zere spieren ien schollers en aarms. ‘Trek veurtoan wat met lange mouwen aan,’ tipte mien man. En nog meer.

Tsja, t laifst wroet ik nou ainmaal met blode handen. Trek onkruud uut, snoei hier en doar. Op hurken schuur ik langs coniferen, langs prikplanten en rozenstruken. Met alle gevolgen noatied.
Dat wil k dizze veurjoarsweek ook weer doun. Want zo gaauw zun schient en temperetuur oploopt, begunt t te kriebelen. Ik wil wat doun aan schoade dai deur koning “Winter” aanricht is.

Toch wait ik dat je nait te gaauw broene heesters vothoalen motten. Moeke natuur het heul wat opknapkracht. Dat heb k ooit bie n stuk of wat viburnums ervoaren dai k host tot aan de grond tou snoeid haar. Ze bluiden loater zoas ze nog noeit eerder doan hadden.
Diezulfde viburnums bennen nou wéér angstaanjoagend broen. Dus wait ik wat mie te doun stait.
 
Spierpien ien schollers, aarms en nek zal k nait heulemoal veurkommen kennen. Mor onze toen zal der ien t kort weer uutzain as n ploatje. Onze schoenlappersplanten – noa de winter slap, muide en heulemoal platsloagen – bennen doar al n veurbeeld van. Met de dag zug je de bloaderen dai op leer lieken gladder en glimmender worden. En ook de lutje narcissen bluien volop.

En man zien goeie road? Doar hol ik mie toch mor aan. Ik trek n trui met lange mouwen aan en dou der toenhandschoenen bie aan. Ik ben benaid…

Piety Veenema

Reageren op mien column?
Mail den noar info@pietyveenema.nl of noar piety-veenema@live.nl
 
Verschenen in magazineWelkom in het Westerkwartier.nl. Jaargang 2 nr.10 , mrt-apr 2014