Tien kilo kwiet
t Was op n dag ien juli dat onze zeun bie ons op de kovvie was. Hai haar t over Boris Johnson, die haar t volk tousproken dat ze nait te dik worren mozzen. Hai haar zulf Corona had en was de zörgverlainers hail dankboar dat er der deurhen kommen was. Hai was zulf ook goud aan de moat en dat was nait goud veur t herstel van Coronapasjenten. Ons zeun keek der hail overtuugd bie en ik vuilde mie aansproken. Ik haar de teugels op dat gebied oareg vieren loaten en was onderhaand ook veul te zwoar. Ik ging vot op weegschoal stoan en zag tot mien schrik dat mien streefgewicht beheurlek overschreden was. Dit mos aans.
Ik ging koamer weer ien en zee tegen ons zeun en mien man. Ik begun vandoag nog. Ik stop met alle lekkers en eet allain nog gezond. Ze keken mie aan of t ien Keulen dunderde mor ze zagen aan mien gezicht dat ik t mainde. Ons zeun begon direkt entoesiast te proaten. Hail goud mamme, en den nait denken van ik maag dit nait en ik maag dat nait mor positief denken aan t nije figuur dat derveur ien de plak komt, en denken: ik ken het! Staarke wil en der veur goan om je beter te vuilen.
t Is nou februoari en ik heb noa dai dag nog gain gebak, koekjes, kouk, sukkeloa, chips, ijs of snoepkes meer had. As ik zin aan wat haar pakte ik fruit, neuten, gekookt aaike of n dreuge krekker.
Alle doagen goan mien man en ik n end wandelen of fietsen en weegschoal gaf vandoag een mooi getal aan. Dat is tien kilo minder as op de dag dat ons zeun zien peptalk hail.
En hou ik mie nou vuil? Veul laineger. Kleren zitten weer lekker, en as ik ien spaigel kiek zai ik weer n mooi figuur. Dat dat mooie figuur bie mie heurt ken mie nog alle doagen bekoren.
Coby Poelman-Duisterwinkel